"Noxibant Nirmilelem" Kotha Jhelo

"NOXIBANT NIRMILELEM" kotha jhelo hem Romi Konknni pustok halinch uzvaddak ailam.

Yeta tea Budvar-a thavn, char bhagamni, hea pustokantli xevottchi kotha, NOVO PORZOLL GHARABEACHO, tumkam vachunk melltoli. Pon'nas vorsam fattim boroilelea kanniamchem koxem pustok zalem, hem Dale Menezes pustokachea survatek sangta:






BOROVPI BABUSH



Camilo Menezes, ho sov bhurgeam modlo Sebatiao ani Pascoela Clara ˜Cassiana" Menezes hancho poilo put. 19.07.1938 vorsa to zolmolo. Camilak tin bhoinno ani dog bhav. Tantuntlo nimnno bhav, Walter, mhozo papa. Hanv Walteracho put. Mhonntoch, Camilo mhozo titiv. Punn ghorant ani ganvant, papak dhorun, Camilo-k soglle ˜Babush" hea nanvan vollkhotale. 28.07.1998 hea disa to hea sonvsarak ontorlo.



Camilo "Babush" Menezes, ho Konknni bhaxentlean khub boroitalo mhunn amkam aiz unneant-unnim pon’nas vorsam fattlean kollon ailem. Mhojea papan, halinch aplem dusrem pustok, ZOIT ani her kovita, Goa Konknni Akademiche arthik palov yevzonne khala uzvaddak haddlolem. He yevzonne khala, tannem Akademik pon'nas proteo divpacheo asleo. Ani heach kamank lagon to Goa Konknni Akademint gel'lo. Thoim taka Brazinho Soares bhettlo.

Brazinho-babak Babush mhozo papacho pai dislo, ani tannem hem khorem kai mhunn mhojea papak prosn kelo. Mhojea papan taka Babush aplo pai nhoi, punn aplo vhoddlo bhav mhunn sanglem. Tednam Brazinho-baban taka, Babush khub vorsam adim ˜A Vanguarda" satolleacher neman boroitalo mhunn sanglem. Brazinho-bab tachim borovpam neman vachtalo, hem-ui tannem sanglem.



Hi gozal papan ghara yevn amkam sangli. Tednam mhoji baravechi porikxa niktich suru zaunchi asli. Hanv Babushachim borovpam, kovita ani kannio sodun kaddunk volunteer zalom. Tache uprant hi gozal thoinch thondd poddli. Mhoji porikxa sompli ani suttio poddleo. Punn hanv Babushak visronk nam ani rokddoch dusrea disa Ponnjechea Central Library-nt gelom.



˜A Vanguarda"-che char motte, dhull boslele gronth (volumes) thoim kam' korteleamni mhaka sodun dile. He gronth 1955 tem 1958 vorsantle asle. Sokallchea adesak kainch mellunk na. Jevonn korun yetoch ani thoddim dhullan bhorlelim, holdduvim zalolim panam challun xekim tachem poilem prokaxit zalelem borovp mhaka mell'lem. Charantle-char-ui gronth challtam mhonnosor sogllo dis somplo.

Poilim-poilim mhaka tachem borovp khub thoddem mell’lem. Punn zoxe ‘A Vanguarda-che ank prokaxit zait gele, toxim tachim borovpam sohoz dolleamni bhoronk laglim. Hanvem tachea borovpache digital camera ghevn fottu kaddle. Tacho written output pollevn hanv thottaklom! Tachi ek kotha "˜Noxibant Nirmilelem" tor att bhagamni serialize zaleli! Kednam oxem zatalem ki eka panar tachi kotha astali, zalear dusrea panar tachi kovita. To kednam-kednam borovpam-i boroitalo.



Digital camera-cher fottu kaddun mhojem kam sompunk nam. He fottu computer-acher ghalun, tantuntlim utram hatan borounchim aslim. Tachem sogllem borovp hatan boroitam mhonnlear sumar ek mhoino laglo, ani don motteo diaries bhorleo.



Magir, ek kall oso ailo, ki Babusha bhitorlo borovpi xant zalo. 1958 vorsa tannem ekuch borovp kelem. Ghoddie tannem tiatr borovnk survat keleli asot. Karonn, amche Kepemche ganv-bhav je Babushak tornne pirayer savn vollkhotale, te tachea tiatranchi azun yad kaddtat. Favonam Tem Mevonam, Mhozo Oprad he tache gazlole tiatr khoim. Punn tachea tiatranchim hatborpam amkam aiz legun mellunk nant.



Apunn khub boroitalo mhunn tannem kednach amkam, kuttumbantlea vangddeank, sangunk na. Uprant papa borovnk laglo. Torui to ogich ravlo. Amchea ghorant ek vhodd Konknnicho put aslo hi konnakuch khobor nasli. Papak dhorun!



˜A Vanguarda"-cho Konknni vibhagacho sompadok aslo Prabhakar-bab Tendulkar. Hea satolleacher nodor marli zalear konnak-ui gomon yetolem, Tendulkar-babak vision ani upatt mog aslo – Konknnicho!



Him sogllim borovpam adle pod'dotin boroilelim asat. Tanchi vakea-bandavoll toxea toxich dovorlea khori, punn xud'dh lekhonache nodrentlean zagear ghaleant. Punn ami mathalle (titles) toxech dovorleat. Hache fattlem karonn itlench: amkam hea borovpantlean vachpeak tea kallacho Konknnicho pormoll divnk zai. Hea kanniamni khub Purtugez utram / Purtugez loanwords asat tim ami toxinch dovorleant ani pustokachea xevottak tanchi utravoll (glossary) dil'li asa.



Babushachea pustokachem nanv ˜Noxibant Nirmilelem - Kotha Jhelo". ˜Noxibant Nirmilelem" hi tachi mukhel kotha. Pon'nas vorsam adim boroileleo kotha khoim tori xirkon asleo. Teo ami chukun (by default) Brazinho Soares-achea eka utrantlean sodun kaddleo, ani pon'nas vorsam uprant Babushacho sompadok tachea pustokachi prostavona boroita - hem oslem bhangarachem bhag, mhaka tori dista, amchea NOXIBANT-uch NIRMILELEM!





________________



Pustokachem Mol: 60/- Rupia



Pustok hanga mellta:

Moddganv: ZITO'S, Cine Lata lagim

Ponnje: BROADWAY BOOK CENTRE, St. Inez, Caculo Island -a lagim

Kepem: STAR BOOK STALL

Kuwait ani Gulf: Goa-World.Com Team



Uzvaddavpi: Walter Menezes

Cusmane, Quepem, Goa - 403 705

email: cindypublications@...

Goa's Pride - http://www.goa-world.com
Gulf-Goans e-Newsletter is presented by Ulysses Menezes,
www.goa-world.com and moderated by Gaspar Almeida (since 1994)
http://www.yahoogroups.com/group/gulf-goans

Konkani Amchi Mai Bhas Sogglea Goenkaranchi - hench amchem herans.
For all Goans, our mother-tongue Konkani, is our pride!
http://www.songs-from-goa.at/goa/
http://www.youtube.com/watch?v=M5ECJrnqPcI